بــــــــــــــــــــــعد المغرب تقريبا

كانوا يجلسون في الصالة‏,‏ هو علي المقعد الكبير الذي الي يسارك وأنت داخل‏,‏ والحاجة علي المقعد الكبير الذي الي يمينك وأنت أيضا داخل‏,‏ وزوجة الابن تلم ساقيها في ركن الكنبة الصغيرة تقلب المجلة وتطالع فيها‏,‏ أما الكنبة الكبيرة المواجهة للمدخل فقد كانت خالية إلا من كومة وسائد مبعثرة‏,‏ وفي المنتصف كانت الطاولة البنية الكبيرة‏.‏ كان فكر أن يدخل حجرة النوم عندما جاء ابنه وزوجته‏,‏ والولد تركها وانصرف بحجة الذهاب الي الحلاق‏,‏ وكان يعرف أنه بعد الحلاق سوف يجلس مع أصدقائه في المقهي‏,‏ وهو زمان كانت لديه قيلولة يأخذها بعد تناوله الغداء‏,‏ أما الآن فهو يأخذ القيلولة عدة مرات سواء في النهار أو في الليل‏,‏ أحيانا يقوم منها دون أن يعرف إن كان نام فعلا أم هييء له‏,‏ والآن كان يغالب النعاس بالاستماع الي التليفزيون الذي كان ملاصقا للجدار الأيمن ولا يراه إلا من الجنب‏,‏ كان يلمح خيالات فقط من صور الفيلم القديم ويسمع الأصوات ويتعرف فيها علي صوت الراقصة كيتي واسماعيل يس وعبدالفتاح القصري‏,‏ وانتبه فجأة علي صوت الحاجة وهي توجه كلامها إليه‏:‏ ـ هو أنا امبارح كنت باقول إيه‏,‏ يا اسماعيل‏,‏ وانت رديت قلت إيه؟ وهو انتبه الي كلمة امبارح‏,‏ لذلك قال‏:‏ ـ امبارح امتي؟ ـ إمبارح واحنا قاعدين‏.‏ قال‏:‏ مش واخد بالي والله‏.‏ ورمق زوجة ابنه ووجدها مستغرقة في المجلة‏,‏ ورفع عينيه الي الحاجة ووجدها تتطلع أمامها وهي غاية في الدهشة‏,‏ ثم أطرقت تتأمل أصابع يديها المستقرتين في حجرها‏,‏ حينئذ قال‏:‏ هو حصل حاجة والا ايه؟ قالت‏:‏ أبدا‏,‏ أصل أنا امبارح سألتك عن حاجة‏,‏ لكن مش فاكرة انت قلت إيه‏.‏ ـ وفاكرة الحاجة اللي سألتيني عنها؟ ـ هو أنا لو فاكرة‏,‏ كان ايه يخليني أسألك؟ قال‏:‏ معاكي حق‏.‏ وراح يحاول أن يتذكر ما جري بالأمس‏,‏ وزوجة ابنه قالت‏:‏ ـ تشرب شاي يا بابا؟ وهو وافق‏,‏ وبعدما قامت دخلت المطبخ قال‏:‏ ـ أنا افتكرت دلوقت‏,‏ احنا اتكلمنا امبارح عن سلك التليفون‏.‏ ـ قالت‏:‏ أيوه كده‏,‏ أنا سألتك عن إيه بقي؟ ـ أبدا‏,‏ انتي قلتي ان السلك قصير‏,‏ وأنا قلت لك إن السلك طويل‏.‏ استغرقت في التفكير‏,‏ وبعد فترة تمتمت تحدث نفسها‏:‏ ـ تليفون إيه؟ وسلك ايه اللي قصير؟ وسلك مين اللي طويل؟ احنا اتكلمنا في حاجة تانية خالص‏.‏ وهو سمعها وقال‏:‏ ـ جايز‏,‏ أنا الحقيقة مش فاكر‏.‏ ـ اللي مش فاكر ده‏,‏ بدل ما يقول تليفون‏,‏ ويقول سلك قصير‏,‏ ويقول سلك طويل‏,‏ يقول انه مش فاكر وخلاص‏.‏ وجاءت زوجة ابنه بالصينية وضعتها علي الطاولة وناولته الكوب‏,‏ وجلس هو يتابع الخيالات الجانبية لصور التليفزيون‏,‏ ويتعرف علي أصوات الممثلين‏,‏ كما كان يفعل قبل أن ينشغل مع الحاجة في هذا الكلام‏.‏